يا زهرة في الربيع

ردّ قلبي في مَكانِه

كان عِينَكْ بالخِيانِه

طارِحُهْ عِنْدَك أمانِه

ما بغِيْتُهْ يِضِيْع

رُدَّ قَلْبي رُدَّ قلبي

خَلّنا نِشْقى بحُبّي

ما بغِيْتَـك قَطّ جَنبي

وِانْتَ كُنْ للجميع

رُدَّ قلبي ياحبيبي

وِالّـذِي شُفْتُهْ نصيبي

بَاصُبُرْ عالجُرح ذي بي

مامَعِي لَكْ شفيع

باهْجُرَكْ بَنْساك مرَّه

بـاطْرَح المـاضي وذِكْرَه

لَوْ حَياتِي اليَوم مرَّه

لَوْ فؤادي صَريع

بانِسَى ذِيْك اللّيالي

بامِسَحْها مِنْ خيـالي

بارْخَصُهْ ذي كـان غالي

يُوم شُفْتَكْ تِبيْع

فـَيْش ماقَلْبي تِهَنّى

يُوم كان الحُبّ مَعْنا

خَلّ قلبـي اليـوم يِفْنَى

يُوم جُرْحُهْ فظيع

بِعْتَنا أو بعْت عُمْرَكْ

هِنْتنا أوْ هِنْـت قَدْرَكْ

يُومْ نالوا النّاس ثَغْرَكْ

لاَجْل ذِكْرَكْ يشيْع

كُنْت في بُرْج الـصِّيانِهْ

يُوم رَاعَيْت الأمانِهْ

كُنْت ما تَرْضى الهَيانِهْ

كان حُصْنَكْ مَنِيع

آه يا قَهْري وغُنْي

خَاب فِيْك اليُـوم ظَنّي

وانْت لي قُدْ كُنْت فَنّي

كُنْت فَنّي البَدِيع