يا آح ميتين آح منها لانت اخشام الـضياح
واقوى جبل منها يصبح طايحي
ينداح لما راح واصبح طيف تذراه الريـاح
تجزع عليه المقبله والرايحي
من قلبي الطماح في شوف الظبا البـيض المـلاح
ذي شفت في المرعى وسط خبت افيحي
محزر كل لرواح واعيان المها فيها الـذباح
ياريت ماجنا عصير البارحي
سن للكبد مفتاح من بعد التحيه واصفاح
واتملك القلب الصغير المستحي
عاده بدا التفاح في صدره مغطيه الوشـاح
ياشاري التفاح والله رابحي
قالن لبا المرواح بعد البوش نرجوك السماح
كلمه لطيفه ماصـبحت في صالحي
زادت عَلَيّ لجراح والقلب الولع دوح وداح
وامسى وسط بحر المحبه سابحي
ماطاع لي يرتاح لا رأى نجم والابرق لاح
قال ابتسم مولى الجبين الواضحي
ذي كنه المصباح يضي فوق لعيـان الـصحاح
واسبال منها كل عاشق طايحي
شعري بحبك باح ياقاتل ولابيدك سلاح
عينك طغت فوق الـسلاح القارحي
لاسامحك ياصاح بعدك ضاقت الـدنيا الفساح
وامسى عليك الليل طول أتـونحي
ياالطير يالمياح خذ لك لجر يازين الجنـاح
يلّي على الريش المصفف سارحي
جب لي نبا وافراح من ذي مبسمه بالعلـك فاح
من قبل يصبح من محله نازحي
واتعذب المتاح في حبل المواعيد الشحاح
عسى وخلي في وعوده ناصحي