بين الورود الزكيه بين الغصون النضيره
بين الــثمار الجنيه كلّــين عينه قريره
الماي يشرح هيامه ما تسمع الا خريره
والزهر يشكي غرامه لما انحرم من خبيره
والورد جُرْحُهْ بدَمه قد باح بسره عبيره
ساعه هنا في الحسيني تشّفي الجراح الخطـيره
ساعة بأرض الحسيني كلّـين خله وزيره
يحكم ويرسم ويأمر والدهر يمسي سميره
الحب حاكم ووالي والقلب ياذا سفيره
بامشي مع الخل ساعه باأقطع بها الكـون سيره
من الفرح طار قلبي ركب جناحه نشيره
والعذل يدهف وينهف مسكين بركت حميره
ياخل حلو الشمايل يازين صافي الـسريره
قلبي حياته مشاكل ياليت تقرأ ضميره
والله ماأحب غيرك هيهـــات الله يجيره
يشد أزره بحبك يكون دايم نصيره
ياما وياما تعذب تشهد بذا اهلي وجـيره
والحب في الله ماهوه يا خِلْ خَطِيّه كبيره
قدمت روحي هدية أيضاً هديه صغيره
لو تدري مقدار حبك عندي لما ثرث غيره
ياخل نفسي وفيّه دايم لحبك أسيره
قد كان قلبي يرفرف لما داخل في الحضيره
الحب في سهم لحظك ياخل يرسل بشيره
والموت من كثر هجـرك للقلب وصّى نذيره
الـّصب من كثر صدك قد عز والله نصيره
طرفك الى الحب قاده لما وقع وسط حيره
الحب جيشه جفونك والآه مني نفيره
يامن لطلعة جبينك تكـسف شموس الظهـيره
إياك تسمع عذولي شوف الإبَرْ في حريره
العذل جيّش لفتنه وأنا لهم حصن صيره
قلب المتيّم تحطم ما باقي الاّ زفيره
ياليت عذلي رحمني ياليت ماذا يضيره
لحظك كسر لي فؤادي ياليت يجبر كسيره
ياليت تسمح بزوره على ضفاف البحـيره
ياخل لا طال بعدك تصبح حياتي شريره
ياليت تحيي عظامي حتى بنظره قصيره