قلبي في القطن قاطن
وان شف.. شَفّ العَنِين
لا تنكرونه مواطن
له نخل فيها وطين
وان كان جارت وشحّت سنينه
وحلت مسامير بَمّ المكينه
ولعاد حصل بن آدم يعينه
ربه معه بايعين
لي يبحثوا عالمعادن
في القطن متواعدين
كل من خرج جاب ضامن
ونا ندوّر ضمين
قلبي إليهم تزايد حنينه
لو ما صروف الوقوت المحينه
كل عـام وَدّي إلـيهم ظعينــه
باخرج مع الظاعنين
ما حرّك الصبر ساكن
والدهر بايده سِكِين
والحَبّ تحت المطاحن
بايخرجونه طحين
والصدق بايبان ساعة عجينـه
منخول والا انطحن هو وطينه
على العمل والأيادي الأمينه
الناس مستامنين
صرع الشتا والبطان
شلوه آل البطين
قطعوا وفكوا الرهاين
كُلين بذنبه رهين
يابخت لي ما حنـث في يمينه
وعزز النفس قبل الهوينه
خلا عمر هو ويا بامتينه
الله حبله متين