غبش قمري حمامه
سجع فوق غصن البشامه
يحن عاذكر زامه
ولا حن نا حنيت
وخاطبته بلفظي
وجوب عَلَيْ قبل يمضي
وذا من حسن حظي
ومن حسن ما لاقيت
ألا ياطير قل لي
عسى ماانت مشتاق مثلي
وخلك مثل خلي
يخونك اذا قفيت
سمع مني نصيحه
اذا انته من اهل القريحه
قنع ماهي فضيحه
اذا قنعت وتناسيت
لأن الوقت عايـب
صاحبك ياخس صاحب
يهينك إلا أنت غائـب
وإذاقبلت ردك سيت
اذا ماشى بأيدك
يعدي جَنَبْ مايريدك
ولا ساعة يفيدك
سوا جيت أو بتيت
مضى وقت المحبه
وأيام حلوه وعذبه
مع ذي نا نحبه
وِوَلّي ونا وليت
رعى الله ماتقدم
معك يامنى خاطري ثَمْ
عَبَرْ كُلّه نَجَحْ تم
وريته رجع ياريت
تركت الصب وحده
يقاسي همومه وسهده
ومن بعد الموده
على صاحبك شقّيت
ولكن مايخالف
عسا يوم فرصه تصادف
يرقين العواطف
ويحيى الفؤاد الميْت