ناديت يا اهل الهوى من ضل عقله يجي له
يشل عقله معه
واتفكروا ما جرى يا اهل الهوى ذات ليله
بالساعه السابعه
لقيت في ملتقى الغزلان سمراء جميله
بين الـشجر جازعه
ناديت يا بدويه يا أم العيون الكحيله
يا شمس يا طالعه
يا لابسة ثوبش الأخضر وراوي بنيله
وأفـصاصه اللامعه
ها وقفي لي أمانه واسمعي لي قليله
قالت أني سامعه
ارحب على الرأس ماهبت نويد المهيله
والفين متابعه
وأيش أدخلك يا مسافر بالطريق الطويله
قفارنا الشاسعه
في أرض لا ماء ولا مرعى وحمراء قحيله
خبوتها واسعه
قل لي من أين أنـت وايش اصلك واسم القبيله
وأي القضاء تابعه
فقلت لا تظلمي مسكين عابر سبيله
وحالته ضايعه
أصلي من القوم ذي ما أحد خدع في زميله
حصونها مانعه
أرض البطولات يحصب والفروع الأصـيله
علومها شايعه
والاسم صالح ومن عينيك روحه عليله
والفاضـك البارعه
شي عندكم للهوى دله وللحب حيله
تكون لي نافعها
وإلا فمن قد قتل لازم يواري قتيله
وإلا فشله معه
الحب يا فايق الغزلان ما بش مثيله
بايامه البادعه
أحلى من الشهد يوم الخل بادل خليله
القبله الرابعه
قالت لي اسكت ولا تنطق بأصغر وسيله
باخبارك الموجعه
لا يسمعوك أخوتي كلين يرفع صميله
نصالهم قاطعه
الحب يا يحصبى نعمه من الله جزيله
والناس له خاضعه
ولوعة الحب ذى خلت عضامك نحيله
ومعدتك جاوعــه
الحب يشتى عقول ترعاه وانفس نبيله
يـشتى قلـوب شاجعه
وإلا فشهرين لو طالت ويظهر بديله
وإن القلوب قانعـه
هيا معـى قريتـى حيث الـشرف والفضيله
والكلمه الجامعـــه
تأكل وتشرب وتجني من غروس النخيله
ثمارها اليانعه