مشتاق يا صنعاء

مشتاق ياشوق السهول للامطار

شوق المسافر للوطن و الأحباب

مشتاق يا صنعاء والشوق قهار

مشتاق للجلسة جوار الاصحاب

والقلب يا صنعاء حزين محتار

والدمع شلاله غزير درّاب

والعود في الغربة ثقيل الأوتار

لا العزف في باله ولا الغناء طاب

والنار في جوفي , من يطفي النار

ومن يظلل لي سحاب سكاب

يا من يجابرني , و يدي أخبار

ومن يطمني عن الذي غاب !

بشارته يبشر بها ويختار

معادبش فيها شروط وأتعاب

له بُن من حجة , نديم الأسمار

وله من الروضة زبيب و أعناب

وله من المشرق زجيل واشعار

يستاهل الضيفة بكل ترحاب

وله من الساحل , فطور بحار

ومن عسل دوعن صحون و أكواب

ومن عدن يبخروه بخار

وفي الحسيني يفتحوا له الباب

ومن تعز العز , فل وأزهار

من اللواء الأخضر بلس وعناب

ظبي اليمن فوق الهضاب فرار

وفي الروابي و السهول وثاب

جلسة معاه قالوا تطيل الأعمار

ومن تعلق في هواه ما شاب