وا عمتي منو شقل لمسعود
بعامنا الأول رزقنا مولود
مسعود هجر وخلف المصائب
والبعد طال وزادت المتاعب
..
من قلة المصروف وكثرة الدين
بكر مسافر فجر يوم الاثنين
وقت الوداع سلم وقال مودع
لا تحزني ششقي سنة وشرجع
شفارقك بعد الزواج بإسبوع
العين تدمع والفؤاد موجوع
شذكر الحناء وحمرة الخد
شذكر الزفه واليد باليد
..
واليوم لا مكتوب ولا صدارة
وعود خلي كلها خسارة
مرت سنين والقلب مسكن الدود
ماحد درى أين الحبيب موجود
وا عمتي كيف البصر لحالي
ضاع الشباب وطالت الليالي
قوتي القليل من الشقاء مع الناس
البسل أكل وجهي وشيب الراس
..
وا عمتي إبني هلك من الجوع
الحب زلج واني مريض مفجوع
رك النضر وجرحوا السواعد
وكم شكون صبري وكم شاجاهد
مقدرش عاد أشقي
ولا أقدر اسأب
ولا اقدر أتمهر
ولا اطحن الحَب
شهرين مريض محد ظهر يراني
يارب تسامح الذي بلاني
احرقتني لا تبكي يامحمد
الموت أفضل للفقير وأسعد
ابوك نسى الحناء وحمرة الخد
واني الوفاء لحدي والموت يشهد
وصيتي يابني تكن شهادة
بأن ابوك احرمني السعادة
لكن مسامح قد يكون معذور
وربما هو الأخير مقبـــور