مرايا الشوق
حبيبي
في عيونك ذي مرايا الشوق
تتنقل
تتوهني
وتبهرني
وترسم لي الطريق أطول
أعيش فيها
وأمشييها
من الأول
وياما في مرآيا الشوق
طوفنا
نغوص العمق
نحلق فوق
ويا ما رحت في هذي المرايا
الزرق
أغني الحب
وأتأمل
وكان قلبي معي يرحل
ورغم البعد
ورغم النار
والاسوار
بانوصل
وبانلقى …أكيد
الآتي من أيامنا
أجمل
سلامتها عيونك ذي
مرايا الشوق
سلامتها
سلامتها
هوانا
كل يوم
في كل سوم
يورق
ويتجدد
وانا وانت
اللي نمشيها
مشاوير الهوى
والشوق
يتوهج
ويتوقد
دموع اللوعة في عينيك
كفكفها
وكف الآه
وصدقني
نبات الوعد
من نار العذاب المر
يتولد
ويتورد
وليش نأسى
ونتألم
وما كانش يوم
ما بيني وبينك حد
تعال
فرشت لك رمشي
طريق
من غزل أنغامي
على رفاتها .. تمشي
حبيبي …
يا حبيبي
وعدنا الأغلى
مصيره بكرة يتحقق
وساعتها
القيود اللي تباعدنا
وأوهام الحدود
اللي أقاموها
تتمزق
تعال
يا وعد أيامي
تناجيك خضر أحلامي
تعال نبني جنان الحب
ونتوحد
سلامتها عيونك ذي
مرايا الشوق
سلامتها