مايحتاج ذا كله
خل الغنج ذا خله
هذا قد عبر حله
وللي راح ما هو جاي
مايحتاج تجرحنا
كلمة جبر تفرحنا
وان زليت سامحنا
شف بعض القلوب ازجاج
مايحتاج ذا الكبره
خد من لي مضوا عبره
انت ما انت في الزهره
عادك عامد إلا الفـاج
مايحتاج نتباعد
نحن من وطن واحد
مافيـك انت شي زايد
ماشي فوق راسك تاج
مايحتاج تتحدى
أو تخرج عن المبدأ
سيب العشق بس وأهدأ
العشقة فرح ومزاج
مايحتاج تتعذر
مادمت انت باتقدر
ترجع بعد تتحسر
في المدخل وفي المخراج
مايحتاج تتمنن
انت من ونحن من
كله مالنا في خن
وألواح الـسفينة سـاج
ما يحتاج تدخل جم
شف ذا بحر يتلطم
حاسب قبل تتندم
بين الريح والأمواج
ما يحتاج تتمنع
فوق الناس تترفع
عاده من سرح يرجع
والدنيا كما الدراج