ليلة الحدّ لي مرّت بصفو الخواطر
ذكّرَتْنا بشي ماكان عا البال خاطر
ذكّرَتْنا بلادي ذكّرَتْنا بسيئون
يارعى الله ليالي الأنس في وسط سيئون
يا مخُبّر من الغنّا كفى لا تخابر
لا تزيد الوجع شفنا من الجرح خاير
لا تحاول تعيد السر لي صار مدفون
يارعى الله ليالي الأنس في وسط سيئون
شِعْب عيديد لي ذكره على القلب داير
به فؤادي وضع عربون من كنت صاغر
فيه دار الهوى مابين ليلى ومجنون
يا رعى الله ليالي الأنس في وسط سيئون
ذكر "ليلى" يذكرنا ليالي المسامر
في ليالي الصِّبا في وسط ذيك المناظر
في فرح في مرح بالبسط والحب مقرون
يارعى الله ليالي الأنس في وسط سيئون
مات مسكين بس مامات موت المقابر
راح والله ضحية كلب ملعون كافر
ذا أنا صرت من ظلمه ورا الظهر مطعون
يارعى الله ليالي الأنس في وسط سيئون
مانويت السفر لكن ذا أمر قادر
وإن نويت السفر بامره وعن طيب خاطر
وايش ينفع نروز البر لا قده مطحون
يارعى الله ليالي الأنس في وسط سيئون