ما افتهم لي.. ليش تقصد تعدى في الملاوي وهي قُدّامك الجاده
ما افتهم لي.. ذي سياسه حكيمة منك وإلاّ سخافة عقل ومعانده
ما تفيدك سخافتك وعنادك.. في الملاوي إذا خلّصت زادك
الملاوي تشل كل ما كسبته لها وتقول هل من مزيد
ما افتهم لي.. انت مثل البشر أو عاد شي فيك طلعه عالبشر زايده
ما افتهم لي.. ليش تترك طريق الناس وتمر في عصرات متباعده
لا تكيد الذي ما يوم كادك.. رد نفسك وقصر في بعادك
كلّما جئت باقرّبك قاطعتنا وِبْعِدْت مني بعيد
ما افتهم لي.. ساس مبناك ماكن في الهوى أو سواسك مالها قاعده
ما افتهم لي.. ليش تنده كذا وانت عروقك قوى في المضلعة ماده
كلما هب شعف الخرف نادك.. كلما مر قانص صيد صادك
ليه يتصيدونك وانت لي كنت في كل المغازي تصيد
ما افتهم لي.. إيش كلمتي عندك عادها مثل ماكانت زمن نافده
ما افتهم لي.. عادك تحبنا وإلا محبتك لي أغراض ومزايده
لانته ناصح بود أظهر ودادك.. واذكر القلب لي حبك ورادك
واستمع لا تخلي كلمتي واقفه في الحنجرة والوريد