إذا جاعـت تشكت
عـلى الأحباب وبكت
وهي لي جَوّعت نفسها لمان ركت
وفي جبر الحبايب تِعِبِّرْها محايين
وكم حَلّت ورَبْطَـت
وفوق الحبل نطت
وشَلَّت من حمول الهوى الجاير وحطّت
ولا زالت تِشِل عادها وِتْحُطْ للحين
عزيزه ما تِرَبّتْ
على الأكل المِرَبّت
سوى من ما نَبَتْ في المراعي واستنبت
وِلا تحِسِّبْ لما ورّدته الهند والصين
على المعروف حَبّت
وله شابت وِشَبّت
ولكن أهلها سكّتوها يوم ضَبت
لها قالوا استحي والحياء اصله من الدين
اطاعتهم ولبت
وبعد البعد قربت
وطابت نفسها بالفرح والعين صبت
وقالت كل ما راح باندفنه في الطين
ليالي الهجر وَلّت
وعيد الوصل هَلّت
وباتت بيننا فرحة اللقيا وضَلّت
وبانخزي الحواسد وبانخزي الشياطين
وهت ياهاجسي هَتْ
فمالك عهد تُبْهَتْ
ولا تِهْتَمْ لمن شلّ صوته أو تِبَرْهت
فما زالت معاك السوارح والقوانين