كل المطاريق

كل المطاريق ذي تعبر بها عينه

لكن بغيتك تعـدّي تحت باب الـدار

فيها الحبايب وفيها الأهل والزينه

والكل فيهم يرحّب بك وشوقه حار

يتذكرونك يقولون الخل ذا وينه

وين الذي كان فينا عالي المقدار

ذي كان قرعه اصيل من خير ذي الطينه

ولا يحب التعالي، إن قعد أو سار

غالي ولا له شبيه مثله ولا عينه

مخلص ووافي وكل الناس له تختار

مالك تغيّرت يا حسره وذي شـينه

ماشي معي طبل بـافقع لـك ولا مزمار

ولا معي لك كلام يحتـاج تدوينه

كلام معـسول كله كذب كله عـار

من شي عليه ديـن لابد مايحط دينه

ومن عليه نذر شوف النذر هذا نار

ما باك تغلط تقول الناس هـي عينه

الناس اجناس حد حالي وحد هو قار

وان شي غلـط صار منّـي قـول في حينه

لا شي تـصدق كـلام الواشي الغـدّار