قال بن سعد

قال بن سعد قلبي فوش ياماصبر

وذاق بالكأس تعذيبه وطعم المراره

والذي حبهم ماعاد باينفعوا

والفائده منهم ما اليوم قدها خساره

ضيعوني وهم ضاعوا معي كلهم

قولوهم وين ذيك الهنجمة والـشطاره

جُوْلهم ناس حد يضحك وحد يبتسم

وانتوا المساكين بعد اليوم رهن الاشاره

صدّقوا كذبة الدجال طمّع لهم

لذاك بابور والثاني هباله عماره

لاتصدّق وتطمّع وتمسك بهم

قدك على الفقر احسن لك ولاذي التجـاره

وَدّفوا قولهم ايش الذي ساقهم

ليدّ نجار ما يعرف أصول النجاره

جاب منشار والقيدوم بايشتغل

وانه لقى الكل قدامه مضاريب فاره

قد حفر تحتهم حفرة من حيث لا يـشعروا

حفره كبيرة وغطّاها وسوّى ستاره

مَنْ تركّـى على قرطه وهو يعرفه

يستاهل الموت ذي للغير فرّق سفاره

تزوج الست وجاء يخطب عروسة جديد

خائف على ذي العروسة لا تقع في المداره

لارضـت أو عجبها الـزوج با يفرحوا

أهل العرس بايسوون يوم حامي غبـاره

بايسووا لها دخلة على مطربين

أو بايسووا مَحَفْ من شانها أو زياره

قل لأهل العروسة حِسّكم تقبلوا

حاموا على بنتكم ماحد يفرّط بعاره

ذي خطب عندكم ذا شخص ما يـأتمن

ياويل من صاهره أو قرّبه وسط داره

من غبش يطرده ماعاد يرعى الجميـل

يدعي إن الجمارك ملك له والإداره

قل لبن سعد تمّت خطبه السابعه

ذي كنت خايف عليها لا تقع في المـداره

كَلْفَتُها وزفّوها على مطربين

وعطّروها وباعوها وتمت صهاره

والذي قد فهم هرجـي وذاق الكـلام

ماعاد بافهمه يكفي الحلـيم الإشاره