في سفح وادي الجبر

يا قَمرْ لاحَ فوقَ القِمَّهْ الشاهقهْ

نُورُهْ عـلى الخضرْ أخضرْ

ليتني في شعاعكْ يا قمرْ زارقهْ

أغمسْ قُبَيلَ امْسَحَرْ

أمَسَّحُ الوجهْ ذي أقـسَمْتْ ما فارِقَهْ

واقبِّلُهْ ألفْ واكْثَرْ

والْتَوي فوقَ خِصرهْ دائرَهْ رايقَهْ

كالطّلْ فوقَ الزَّهَرْ

لي معهْ في المحبهْ ذكرياتْ سابقَهْ

في سَفح وادي الشجرْ

قُلتْ لهْ مُهْجَتي في عـِشقتكْ غارِقَه

وانا معكْ في خطرْ

قالْ إنْ كُنْتْ باني تسمَعَ الصَّادِقَهْ

منِّي فعندِي خَبَرْ

مُعجزاتْ المحبّهْ كلّها خارِقَهْ

فوقَ احتمالْ البَشَرْ

عرفتْ مِن يـومْ رُوحي في يـدكْ عالِقَهْ

ما مِن وصالكْ مَفَرْ

بَدْويَهْ يا قَمَرْ مِن نفسِها واثقِهْ

ترعَى الغَنَمْ والبَقَرْ

قلتْ لا تَلعَبي بالنارِ وافاشِقَهْ

يكفي غوَى يا قَمَرْ

عاشقْ القلبْ لا في الهوَى عاشِقَهْ

تَشُدْ نفْسَ الوَتْر

كلَّنا ينتظرْ في القصَّهْ اللاحِقَهْ

حُكمَ القضا والقَدَرْ