سلامي الف

سَلامي ألفْ للدولهْ وللعسكرْ

وللشَّجْعانْ في لِشْعابْ والبندرْ

على صوتِ العربْ قاموا ومِنْ أجْلَك

ويا شَعْبَ الجنوب النصرْ يهْنَا لَكْ

سَلامْ الفينْ لكَ والفينْ مَنْ عانَكْ

وذي بايَرْكَب الأهوالْ مِنْ شَانكْ

يفكّ القيدْ مِن يَدَّكْ ومِنْ رِجْلَكْ

ويا شعبَ الجنوب النصرْ يهنا لكْ

حَلفْتْ ايْمَانْ بالقرآنِ والخَنْجَرْ

وباسم الله رَبِّ العرش ما أكْبَرْ

تحرّرْ أرضَ أجدادكْ وابوكْ واهْلَكْ

ويا شعبَ الجنوبْ النصرْ يهنا لكْ

جميعُ الشِّيب والشُّبانْ في وَحْدَهْ

ينادوا اليوم بالتحرير و الوَحْدَهْ

ومَن يرفضْ مباديْ الشعب باميهلكْ

ويا شعبَ الجنوب النصرْ يهنالكْ

رفعنا الرأسْ، بعدَ اليوم ما نَخْضَعْ

ولا بانرتضى بالذَّل أو نركَعْ

لِنَيْل النصْر باننذرْ بما نملكْ

ويا شعب الجنوب النصر يهنالكْ