روح من فضلك

روح لك مني، روح من فـضلك

روح لك مني، روح شوف شغلك

روح لك مني، مش فارغ لك

روح لك مني، انا مش خامل مثلـك

أنا بين أعمل لاجلي واجلك

روح لك مني، روح من فضلك

أنا مشغول ببناء بلادي

وانت بتسبح لك في وادي

تلغف لك من " قات الـوادي

وكأن حياتك شي عادي

حميك حمى ما اسخف عقلك

روح لك مني روح من فضلك

الناس قد صنعوا طيارات

وصواريخ تعبر في القارات

وبواخر نقل وغواصات

وانت بتتحداهم"بالقات"،

والا بكلام َقلّي قَلّك

روح لك مني روح من فضلك

العالم حلّوا في المريخ

وبنوا بالعلم أعظم تاريخ

واحنا في مزح وفي توبيخ

وعقول للبيع زي البطيخ

عجزك يا ذاك مش طَيِّب لك

روح لك مني روح من فضلك

وأنتي مالك يا ست البيت

عادك فاعل نفسك ينحيت

تشتي من زوجك كيت وكيت

وتقولي ما أديت ما سوّيت

وأنت اتحرك جني شلك

روح لك مني روح من فضلك

المرأة في العالم كله

حق عمل مش حق الرفله

تقري في الشعب لتعمل به

وتضحى بالروح من أجله

وتقول للمستعبد روح لك

روح لك مني روح من فضلك

ما تشتيش قلب ذهب أو ماس

تتخطر به قُدَّام الناس

هي تشتي قلب ذكي حساس

يرفعها فوق العين والرأس

وان تتشلخ يا خي لاهلك

روح لك مني روح من فضلك

حقق لبلادك ما يمكن

من خير ودَبَّر ما يحسن

كافي دبداب شلوك الجن

ما عاد لشدح منمن

والا كل الناس عتقولك

روح لك مني روح من فضلك