دلى بنفسك ولا تسبق زمانك
غدِّار شُفه الزّمان
بدري من الـصبح بـاتطلق رصانك
غلط تفكّ الرصان
تقطع ولالك شوير
وانته مكانك صغير
راجع حسابك ودقق في سطر البيان
تضحك وتلعب ولا هي في أمانك
الخوف عندك أمـان
قبل الشتاء باك تفكر في كنانك
البرد يبغي كنان
وأنت قبل المسير
في الجوّ تبغى تطير
قدّر وقايس وإلاّ شفه ضاع الرهان
تنعف على القوم من صافي حنانك
سمّقتهم بالحنان
عطهم كلام الصراحة من لسانك
أقل شيء باللـسان
الشّخر شوكه خطير
وانته قماشـك حرير
فزعان فزعان هذا العزّ يمسي هوان
ارجوك تسمح تفضَّل من حِسانك
يا سِيد كل الحِسان
لاتترك إنسان أخلص لك وصانك
من أجل تبقـى مصان
تسلى عذاب الضمير
وتشم أزكى عبير
تبقى وتحيا وانته زين فوق الزيان