تغالط الناس تتكر حب واضح
وضحه دمعك لهم توضيح
مالك وللناس لانته صدق ناصح
خل كل من بايصيح يصيح
واصبر على اللكع والتجريح
وعلى المذلات منهم والمهونه
من زل والاّ غلط قل له مسامح
وسمّح أعواجهم تسميح
شي الناس افلام والدنيا مسارح
كم سرحوا من قصص تسريح
مايتركون المليح مليح
والحلو بالقار لازم يخلطونه
يا وردي اللون ياعطري الروائح
يا نزهة القلب والترويح
لاشفتك تغيرت مني الملامح
وبقيت ألّمح كذا تلميح
في عشقتك خائف الاّ طيح
لاطحت شي باتقع منك معونه
منذو عرفتك ونا في بحر سابح
اذكرك في الورد والتسبيح
وانته بوجهك عَلَيْ دوب شايح
وباللقاء ياحبيبي شحيح
متى تصبّح عَلَيْ تصبيح
والا في الليل لاخيم سكونه
ان كان ما نيتك بالحب صارح
انا اقبل الصدق والتصريح
ولا تخلي محبك جاي رائح
يهوي معك في مهاوي الـريح
يكفي من الرمز والتلويح
ما انا بذمتك قرضه او مدونه