قلبي وروحي معك ياداعي الوحـده
الله يبارك وينصر دعوة التوحيد
فيها الأمل للـيمن باتعيد له مجده
وعزته والهنا والخير والتمجيد
كم لك مراقب لها ياشعب من مده
واليوم ماعاد في تقديرها تمديد
وصبرنا ذي صبرنا قد بلغ حده
وتحقق الحلم والمقصود بالتحديد
بعد الـسنين الطويله زالت الــشده
ولاح فجر العمل والعزم والتشييد
يهناك يا شعب هذه وحدتك ورده
بيضا أصيلة جميلة شيد فيها شيد
جنب القيادات ذي قاده وذي قـده
عوج الملاوي وصكت في ركبها قيـد
وفكت الباب فرده بعدها فرده
حوار مفتوح بالحكمه وبالتسديد
وقلب مفتوح لا ريبه ولا عقـده
وعقل مفتوح ضد العجز والتعقيـد
ماحلى ثمار التفاهم كم أنا وده
وكم لقي من سوانا الـدعم والتأييـد
وكل من قامـت الوحـده عـلى يـده
نحن معه جند جاهز ساعة التجنيـد
ومن لقينا المنى والعز في عهده
بانرفعه في سماء العز والتخليد
ومن وعد شعبنا حـافظ على وعـده
مافائده بعدها بالشجب والتنديد
شعب اليمن قد تعب كم بـايقع جهـده
على الضنا والمحن والفقر والتشريد
واليوم قالوا وصلنا قارب النجـده
ياطاقم الخير قدنا جنـب قائد جيـد
ماشي لنا عاد من تحقيقها رده
الأمر محسوم ما يحتاج للترديد
نشتي عمل بانحصل بالعمل وحده
طيب الاماني دواني في الـوطى والحيـد
مارزق ياتي لجالس قُرْص لاعنده
ولا فلح فرد بالتطبيل والتحميد
من كد يهناه يجني من ثمر كده
ومن فعل خير حصل خير بالتأكيـد
ياهل العقول الزكينه ساعة الهده
واهل السياسة رموز الحر والتبريد
شدو حثيث الخطى شده قفا شده
ماعاد شي وقت للتفريط والتبديد
لاجل الرخا والتكافؤ عدوا العـده
وجمدوا مامضى من سبيله تجميد
سيروا على نهج يضمن للـيمن سعده
بالحرية والرخا والعدل والتجديد
واستنبطوا كل ما يمكن لكم حشده
من حلم او علم ضد الجهل والتبليـد
اصل اليمن منتظركم تفهموا قصده
حله جميله من الابـداع لا التقليــد
الشعب تيار يغرق من سبح ضده
هذا مثل حـي لابدعه ولا تهديــد
وانتم معي باركوها دولة الوحده
وذللوا كل ماهو يخدم التوحيد
خـير الـيمن خـير لاقبله ولا بعده
في وحدته بانسوي كل ليله عيد
والحمد لله زايد حمد من حمده
يستاهل الحمد باجازيه بالتحميد