قريب بابدل بداري دار
معمورة وديره غير ذا الديره
لكن قلبي مارضي يختار
غير الشحر لأوليته الخيره
حبه وتقديره
لها من سمح ولها العز والمقدار
وطني وفيه الـساس والآثـار
به نسعد ونتأثر بتأثيره
دائم ونا فوقه محلق فار
حاشا تهجر الوادي عصافيره
تزدني الغيره
ونتشوق إلى شمسه وظل الغار
زماني الجاير عليه جار
سبّب لي فراق الأهل والجيره
البعد قد أضحى لحالي ضار
و أضني غصني الباسق وهو ضيره
نقطع مناشيره
وسط قلبي كما ما يقطع المنشار
ودعت أحبابي وداعا حار
لي منه ذهاب العقل والحيره
واعطيتهم وأعطوني الأسرار
والحساد ماجبنا لهم سره
خايف من النيره
وخايف تشتعل بَعْـدي علـيهم نـار
جديت عزمي بقطع المشوار
من له حظ بايقطع مشاويره
ونعود لاقد طالت الأعمار
والخارب يجود الله بتعميره
راجين من لخيره
يساعدنا ويسعدنا كما الأخيار