الناس ماخلو لحد حاله
وانا جبير الناس ماباقول ماحولي
ان شفت حد بايده شعق شاله
باهجره باقاطعه مابا سقيه من شولي
وش قَدّر الانسان يأخذ كل ليلة شال
مانا على حد منهم عاله
نعرف نكورها اذا قد نسنس العولي
عالريح نمشي مانبا الآله
والبحر بحر الله مابقول لَهْ أوْلي
لكن باسلم من وقف سكروب وقبع وال
وثقت به وقبضت بحباله
خلا قِشِنْ يضحك عَلَيْ في السوق وِحْبُولي
ذا وين وعده وين اقواله
ماقام عاقوله وأنا لي قمت عاقولي
لا قلت لُهْ ماقلت هذا قال لا ماقال
من حب حد تمّا على جاله
يملك على شانه من الغالي ويستولي
وإذا طلب قاسمه في ماله
وعطاه حبه والمحبة نهرها مولي
يسقي ويروي من ظمي ويحقق الآمال
مابش سخا يادار بن قاله
شلوا قبالش والقواسم ايش بقولي
والوعن لي مصفوف في الصاله
تقاسمنه لابسات الطان والصولي
طاردتهن وتعبت جانا من عظامي الصال
عين الحسد والبغض قتّاله
لكننا مانا سهب شليت مقتولي
كل من صَرَب موسمه ماكاله
ولا طعم حّمال من رزقه ولا كولي
و لا حفظ له في الوسل مُصْرَه ولا مكيال