شِلّ بالصوت نِسْنِس يا المُوَفّق
يوم صوتك شَجِي جَم عنه قلبي مُوَافـِق
سَلّنا في الليالي ذي مكَدَّر ومَكروب
مِنْ هَوىَ عَذِب ما مثلُه تَخلّق
جَلّ خالقه لي سَوَّاه ياخير خَالِق
طَلْسَم الحُسن في جَبهتُه مَرْقَم ومكتوب
عَاد لا قُد نَـوَح بالـصوت وازْعَق
من مَغَانيه كَم قَطّب قلـوب الخلايـق
لا بيوله كَما نَغْمُه ولا حَنَّتِ النّوب
هَاش عَقـلي وخَلاّ الحّس حَلّـق
حين شفتُه بَـدا للعـين من وسط فالقِ
قُلت ياغارةَ الله بَدرِ في قصر مَحجوب
دُرْ عَلَي كاسَكِ القَـاطِع معَتَّق
لا تخلّيه كاسك يا مُحبِّي مُدَاهقِ
من شروط التَمدُّن نِصف فنِجان مَصبوب
والذّي له يصرّف عَذب مَزْلَق
عنده الفنّ والقانون والرَّاس فارق
باينُظّم فيَ العِدّه بمعنى وترتُوب
والحَلَل منَّها أحمر وازرق
بايسُر قلبك العاشق حنين المعالق
قبل ما تنقطع خَرمَتَك من خير مشروب
والمغاني من اشروطه مُحَقّق
خُذ وصوفُه من امجرّب دَرسَها حقايق
لي سَجَع بالغناء سلاّ بمغناه لِقلوب
ريت كل من تمنَّى حال يلحَق
مايريده في الدنيا وخاطره رايق
مَطلبي في سَمَر لِيْلِه مَعَ خير خَرعُوب
في وَسَط قصر متعالي مُنَمَّق
فرش روُمي وابوميتين بالنّور شارق
بانسَاجِلُه بالمغنى ولا فيه معتوب
والبخاري على جانُبه مِعْلِق
خلَ حَوَاسدي كل من بايعالق يعـالق
عالصفا والنقا ما بانجي حال معيوب
لي سهل امر في ساعه تَعَوَّق
يابن صادق كفـى الله الـشّدَدْ والعوايـق
شي بصر او معك حيله لصاحبك منشوب
السياسه تِلِت والفكر غَلّق
عاد معنا العزايم خاف هي لي توافق
كل غالب بمحيه بانخلّيه مغلوب
يامنى القلب لك خاطري شَوّق
عدّ لأيام لاجلك والليالي دقايق
كُلّ لمحِة بَصَر ذِكرَك على خاطري دوب
بَك فُؤادي وبَك قلبي معلّق
لاجل عَشقِتَك قَطّعْته جميع العلايق
لك محبِّه من الله وسط كل قلب محبوب
واختم القول بالهادي المُصَدَّق
احمد المصطفى في القول والفعل صـادق
ربِّ نسألك به نِسِّم على كل مَتعوب