أمانتك يامولع من حمام الدور
ذَيَّه الحمامي شغلني كل يوم بيدور
في صوته أنغام يتغنى بها العصفور
ولا زجل تحت داري جاوبه شحرور
في قصر عالي ومعموره من الياجور
ذَيَّه الحمامي سكن عايش بها مسرور
في وسط صنعاء القديمة خلـف ذاك الـسور
حيث الغواني وحيث الجار والمجرور
قالوا لي الناس من حبه أنا محجور
بيحجروني وقلبي عندهم مأسور
بيقولوا الناس إنه في الهوى مغرور
ماله مثيل بس هو يشبه بنات الحور
وانا مولع بحب الغانيات مشهور
ومن تولع بحبك يامليح معذور
من حب وإلا عشق قالوا عليه مسحور
بيشعوثوا له ويقروا فوقه المأثور
لاقد تولع بمن قد حل تلك الدور
ما ينفعه طب لو يدوا مية دكتور
والله لولا أخاف الله والمحذور
لا تصيدك صيد ياخلي وهو ميسور
واجعل غرامي معك للعاشقين مذكور
واكتب على باب داري بالقلم مهجور
مابش قوانين لاهل الحب أو دستور
ولا قرارات بالقانون أو منشور
الحب نعمة من الله في القلوب محفور
فكون خلص لمن حبك وهو مجبور
وأعوذ بالله من قول الكلام الزور
وقول حاسد وواشي بينّنا منكور
والختم صلوا على من جاءنا بالنور
شفيعنا المصطفى في يومنا المنظور
وآله الطاهرين من حبهم مشكور
ماغرد الطير ماسبح في الديجور