صوت الهاون يشجيني عاد البرن
لما صوتها يدوي رأسي يحن
وامسى الشعب آمن سالي مطمئن
داري بالقذايف ساري عند من
إن ال اف مصمم تسحبهم جميع
الشاب والملتحي والطفل الرضـيع
كل ليلة سريه كل ليلة خشيع
تجتاز المصاعب تتحدى المحن
باقرّر مصيري ذا شغلي أنا
يومك قد توكّل ذا يومي أنا
قد أصبح مصيرك في يدي أنا
بعد اليوم رأسي والله مااندفن
لفيتوا شقانا مليتوا خيش
كم ذا الشعب صابركم مره انتبش
قد جاكم مشرم حامي عن غبش
في اليمنى سلاحه والشولا كفن
كم ياما بَرَتّوا في أرض الفيوش
جيتونا ضباحآ واصبحتوا طهوش
قلتوا باتسوّوا من جلدي حيوش
بالله ما حسبتوا نكبات الزمن
وإن جينا هرجنا قالوا فلسفه
ذا الشعب الصِّقِلْ قدنا نعرفه
من ايام هتلر واحْنا نعسفه
كم في الصيف ياذا ضيعتوا اللبن
ان جاكم منافق قمتوا تمنحوه
من أرباح قطني قمتوا تكرموه
وإن جاكم شُبيلي كادح تكـردوه
هل هذى عدالة بالله يازمن؟؟
أهلا بالسياسي ذي يطرم طريم
أهلا بالمحنك والواعي الحليم
مالك ولأامانى والحلم القديم
ودّى ذي السياسة في شرج الـودن
إن تشتي نصيحة أحسن جرها
شف هذي الليالي شولا شوفها
خلي الخلق تهجع تهنى نومها
خليـك الــسخافة خليـك الدرن