الفين حيا على خير العمل
والفين عـلى طلعة العهد الأغر
عهد التعاون والانجـازات حصل
وانفك قيد البطالة وانكسر
واحنا التزمنا بتحقيق الأمل
على طريق التعاون والظفر
لا بالتسرع ولا طول الأجل
بانبلغ القصد لكن بالبصر
والجيد من يتبع قول المثل
(مع المدى يقطع الحبل الحجر)
يا ابن الـيمن زال ظلمـك واختفـى
وصيت حريتك في الكـون ذاع
وشعبك اليوم تماثل للشفا
من الألم والتخلف والـضياع
حافظ عـلى مكسب التطوير كفـى
ماقد لقيت في حياتك من صراع
ولا تقابل ولاتك بالجفاء
يشتو لك الخير من غير انقطاع
عليك لأهل القيادة بالوفاء
(ومن ميزك شبر ميزتة ذراع)
شادوا مدارس لتهذيب العقول
وانوار واعلام يهدي للصواب
وجـيش للحرب والاعمار يصول
وبنك تطوير ولجنة للحساب
وكم مكاسب على السامع تطول
اسأل عليها وباتلقى الجواب
خلاص يا فقر ممنوع الدخول
ومرحبا يا أمانينا العذاب
ما قد تحقق لنا فيه القبول
(ودار معمور ولا قريه خراب)
يا ابن اليمن لاحت اليـوم فرصـتك
وحالفك حسن حظك والنصيب
والله من فوق بارك خطوتك
بس تبقى ذكي شاطر لبيب
اخدم بلادك وساند دولتك
من الضروري يكون صدرك رحيـب
سر بالتعاون تحقق رغبتك
(واسأل مجرب ولا تسأل طبيب)