الحي لازم يعود

من قال لك خان خلـك لا تـصدق مقاله

احرص عـل صحبته واتبعه كأنـك ظلاله

لا تسمع الناس لي قالوا حبيبك تناسى أو نسى الجود

مهما يطول الزمن الحي لازم يعود

من قال لك حِكِّم قيوده ومِكِّن عقاله

غيران من حبنا ياحسرته ياخباله

خله يولي ورَكْب القافلة لم يزل ثابت ومشدود

مهما يطول الزمن الحى لازم يعود

من قال لك دال ميزاني ودالت قفاله

ذا إلا حسد وينهم لي يدعون العداله

مازلت شامخ ولا بالنفخ يا صاحبي باميل أو نود

مهما يطول الزمن الحي لازم يعود

من قـال لـك راحت الـصفقة عـليْ والدّلاله

بالعكس حبلي قوي والخصم رَكّـت حباله

والساس ماكن ولا باتهزه العاصفة أو برق ورْعُود

مهما يطول الزمن الحي لأزم يعود

أصبر وشف من صبر لازم يحصل منالـه

لاتحمل الهم والأشيا تجي بالسهاله

بانلتقى في الوطن والله يتم ياحبيبى كل مقصود

مهما يطول الزمن الحي لازم يعود