أزمه وعدِّت وكل شدِّه تزول
وأنت السبب ما غيرك المسئول
كل الـذي بينـي و بينك راح
ما فيه داعي للمجي والمراح
خلاص بعد اليوم مالك قبول
ما في الصراحة عيب يا ابن الأصول
زرعت ارضك وانتظرت البقول
وحاسب اني باجني المحصول
الناس ترقد وانا اسهر للصباح
قلبي تعب ما يوم فيه استراح
وفي النهايه مالقت شي سبول
ما في الصراحة عيب يا أبن الأصول
رفعت راسك ما حسبت النزول
ونسيت نفسك ماعرفت الوصول
واليوم مني تطالب بالسماح
لا تفتكرني قد نسيت الجراح
الجرح باقي للأبد ما يزول
ما في الصراحة عيب يا ابن الأصول
درب الهوى ما بيننا لا يطول
والباب هذا حط عليه القفول
من قبل تتسرب علينا الرياح
اختار دربك ولا لك بي صـلاح
باقولها لك قبل ما أنته تقول
ما في الصراحة عيب يا ابن الأصول
الحب لازم يبتني على اصول
على شان يثمر والعلاقة تطول
وان كان ماله ساس مبناه طاح
يستاهل اكثـر من بنى في البطاح
وحط ساسه في ممر السيول
ما في الصراحة عيب يا ابن الأصول